陳淑蘭
陳淑蘭

聖誕節點可無聖誕樹?

發佈時間: 2020/12/10

聖誕節點可無聖誕樹?

O Christmas Tree!No Christmas Tree!今年係20幾年嚟,聖誕節我屋企無聖誕樹!好傷心呀。

我走勻全港九新界去搵樹,答案都係沽清no more。後來先知今年聖誕樹竟然供不應求,無綫嘅《東張西望》都報道咗,7呎高嘅聖誕樹,要炒到16,800蚊!今年真係黐綫嘅一年,我哋一定要有超強嘅正能量,唔好畀今年啲負能量搞到自己黐綫呀!

好多朋友好熱心,畀咗好多賣聖誕樹嘅網站畀我去訂,多謝晒。不過我要真聖誕樹,唔要假聖誕樹。我每年買真聖誕樹嘅目的,最主要係索佢陣樹味。每當我朝早起身,第一陣撲入鼻嘅獨特松樹香味,令我好舒服、感覺好溫馨,即刻覺得自己好幸福。

唔知係咪今年個個都無得出外旅遊,既然只可留喺香港,更加需要多啲幸福感覺……會唔會因為呢個原因,於是多咗好多人買聖誕樹呢?

究竟聖誕樹係乜嘢樹?有人話係松樹,有人話係柏樹,亦有人話係杉樹。咁多候選者中,究竟邊一個先至係真正嘅聖誕樹呢?松柏類,其實是裸子植物門松柏綱中的松科(Pinaceae)、杉科(Taxodiaceae)、柏科(Cupressaceae)和南洋杉科(Araucariaceae)嘅統稱,而聖誕樹起碼要有呢幾樣條件︰松柏類、常綠、樹形要呈現三角形;滿足到呢啲條件嘅樹木,其實都可以作為「聖誕樹」嚟使用。

其實我喺花墟都見到有啲中國嘅聖誕樹,好似可以符合到,唯一係無聖誕樹嗰陣味,no way!味道對我最重要……結果靈機一觸!新鮮嘅聖誕花圈,加埋新鮮嘅聖誕樹……枝。佢哋一樣超級香!松葉一樣能散發淡淡清新氣息,我仲可以加上唔同植物、花材、乾果同肉桂等,非常有聖誕氣氛,掛起嚟,屋內嘅空氣依然能飄着濃濃嘅聖誕味……呢樣就係我想要嘅嘢!

買唔到橙,執番個桔。我依家就抱住呢個心情,腎上腺素又提升番,幸福感又返咗嚟!呵呵呵!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭