【聲明】港生活網站並無進行電話推廣活動

陳淑蘭
陳淑蘭

勤拉筋,免縮筋!

發佈時間: 2020/12/17

勤拉筋,免縮筋!

閉關嘅日子,好懶。屈喺屋企指定公式︰食、瞓、追劇,再食、再瞓、再追劇……哎呀!抽筋!

我唔係講笑。前陣子,一起身,右手就麻痹。嚇死我,仲以為係中風徵兆。搵專家check check……原來係黐咗筋。相信大家都唔會驚訝我「黐筋」,但竟然黐筋嘅部位係手同背,而唔係我個腦!

原來踏入中老年,唔單止會縮骨,原來連筋都一齊縮……好彩我搵到兩位高手,一位幫我撥筋,另一位中醫師就幫我針灸,隻手無麻痹了。之但係當我停咗唔去搵佢哋修理,隻手同個背又硬番、痛番。

喺醫學古籍中,古人已識得將筋症分為筋斷、筋走、筋弛、筋強、筋攣、筋萎、筋脹、筋翻及筋縮等,筋縮就係其中之一,坐得多,姿勢唔正確,長期篤手機或用電腦,無做伸展活動,背同手、腳嘅筋肌逐漸會收縮,於是造成筋縮。

筋縮可能出現嘅症狀歸納起嚟如下︰頸梗痛;腰強直痛;不能彎腰;背梗痛;腿痛及麻痹;不能蹲下;長短腳;腳跟的筋有放射性的牽引痛;步法開展不大,密步行走;髖關節韌帶有拉緊的感覺;大腿不能抬舉亦不能橫展;轉身不靈活;肌肉收縮或萎縮;手不能伸屈(手筋縮短);手、腳、肘、膝時有脹、麻、痛感,活動不順……

你有無以上是但幾項症狀呢?如果你完全一樣都無……嘩!你真係好叻好幸福呀!

正所謂幸福唔係必然,我深信你平時一定有為呢份幸福而努力--拉筋。

拉筋嘅好處︰一、令累積在肌肉內部的廢物加速排出體外;二、預防拉傷,運動前暖身操必備;三、促進血液循環嘅速度,增強循環代謝功能。

另外,原來拉筋仲可以瘦身減肥。原理在於︰人肥胖,因90%機率係由自律神經失調引起,長期駝背及彎腰姿勢會壓迫到呢啲神經,令基礎代謝率變差,導致體內脂肪燃燒不易。Oh!唔怪得我撥咗筋後,真係無咁虎背熊腰啦!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭