【聲明】港生活網站並無進行電話推廣活動

陳淑蘭
陳淑蘭

買外賣互撑互助

發佈時間: 2020/12/24

買外賣互撑互助

古人話「每逢庚子必有亂」,真係有先見之明。今逢庚子輪迴,一個字形容︰衰!由年頭衰到年尾,由年頭一直折磨我哋嘅正能量,直到年尾……

雖然年頭已經有好多玄學家,預言家預測咗12月會差;我都做晒準備,儲咗水,儲埋糧,更儲足日常用品,但遇到呢個人人自危嘅大時大節,雖然知道保持社交距離係必須的,但冬節大過年,我更珍惜能夠同年紀大嘅媽咪,好好感恩我哋依然平安健康。一於好好咁食餐好嘅,暫時將憂慮拋開。

往年做節,必會出街食,今年只可以叫外賣了。今年因疫情關係,不能時常外出食飯,有更多嘅懶人包外賣或自取服務;佢哋會幫你預備好食材調味,又或者買返屋企翻熱就可以食嘅菜式選擇,真係比之前多咗好多。

今年冬節只得媽咪同我兩個人做節,我外賣咗一個盆菜同羊腩煲,再加埋菲傭姐姐煲嘅響螺湯加臘味飯。甜品當然要同媽咪食湯圓,團團圓圓啦。

今年行行都經營得非常困難,飲食業亦係苦過弟弟,所以大家真係要盡量撑佢哋……

今次我訂嘅盆菜,係幫襯咗位於新蒲崗康強街嘅「得龍大飯店」(現改名為得龍生哥美食)。佢哋已經有超過60年歷史,有好多懷舊古法菜式︰金錢雞、煙熏太爺雞、雞蛋焗魚腸等……老闆生哥係一個好好嘅老實人,我哋電台都時時請佢做訪問。每逢新年,我哋必會喺生哥度訂年糕、臘肉等食品。佢用料新鮮,製作認真,因此有好多新舊顧客support。

至於羊腩煲,我幫襯位於上環嘅竹園海鮮酒家。其實呢度都係我哋成班「酒肉朋友」嘅食堂。既價錢實惠,老闆三哥又係個超級有心人,你鍾意食乜,佢都會盡量配合,最緊要係︰老實!朋友喺手機群組,發咗喺三哥度外賣嘅羊腩煲大讚,搞到我流晒口水,即刻去訂!果然yummy!

庚子無情,但我哋有情,大家喺今年更加要互撑互助,互暖心窩!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭