黛安
黛安

荷里活廣場Peppa Pig新春派對 玩舞龍碰碰車迎牛年

發佈時間: 2021/01/06

荷里活廣場Peppa Pig新春派對 玩舞龍碰碰車迎牛年

下個月就係農曆新年喇,公關姊妹同黛安報料,話荷里活廣場將舉行新春大派對,由今個月中旬至下個月28日,Peppa Pig及一眾朋友將會開party,仲會暢玩連串新春活動。商場設有4個打卡位,其中「龍騰獻瑞」舞龍劇場,Daddy Pig就會帶住Peppa同好友Suzy Sheep喺台上表演舞龍。場內亦設有3.5米高嘅巨型桃花樹,黛安已約好閨密喺桃花樹下游走,希望可以增強姻緣同人緣,戀人仲可以喺樹下打卡,甜蜜放閃㖭。

黛安知道,商場為咗迎合新春氣氛,場內嘅Peppa Pig兒童碰碰車樂園將換上賀年桃花源形象,顧客憑消費或VIC會員積分仲可換領入場券,畀小朋友坐上迷你碰碰車自由穿梭,開開心心咁迎接新一年。

荷里活廣場仲準備咗3款Peppa Pig精品,包括揮春套裝、收納箱及暖水壺,客人憑即日電子消費指定金額單據或VIC會員指定積分均可換領,數量有限,換完即止㗎。另外商場今年特別推出「金牛滿屋」利市封,設計配上可愛福牛,象徵牛年人人家肥屋潤,大家記得到時去同Peppa Pig拜年喇!

撰文: 黛安 消息特靈八卦公關
欄名: 八卦名利場