7-11推台式大腸包小腸 $20歎地道台灣風味小食

黛安已成年無去旅行，真係好掛住外地嘅美食，例如台灣地道小食。聽聞最近7-Eleven自家品牌7-SELECT推出咗台式大腸包小腸，選用台灣老牌香腸，用咗新鮮豬腿肉，以中式香辛料加上秘方及新鮮蒜泥烹調，只需放入微波爐加熱數分鐘，叮一叮就可以食。$20就可以歎到台灣風味，真係好吸引呀！

除咗台灣小食外，7-SELECT仲推出咗港式腸粉，以特製米漿製作，每一啖都有米嘅香味。腸粉配上甜醬、麻醬及甜豉油，混醬撈出香港經典味道，只售$14。仲有新登場嘅炭燒雞肉飯糰，嫩滑雞肉配上鰻魚汁，以炭燒製作，與飯糰搭配簡直係完美組合。每個飯糰都係獨立包裝，$10就有交易，最啱買嚟做小食。