【聲明】港生活網站並無進行電話推廣活動

陳淑蘭
陳淑蘭

多動腦防失智

發佈時間: 2021/01/07

多動腦防失智

記性一向唔好嘅我,喺今年更每況愈下。由睡房去廚房,打開個雪櫃發呆兩秒之後,先記得原來入廚房係應該去開藥櫃攞維他命食,而唔係開雪櫃搵嘢食。時時都無記性,隨着年齡增長,真係擔心自己係咪好易有失智症,定係因為老化,記憶力變差咗?

即刻去搜索下,大約出嚟嘅結論係︰老化係指可能突然忘記某事,但事後會諗得番;而失智則會對於自己講過嘅說話、做過嘅事,完全忘記。而我就只有飲多咗酒,俗稱「斷片」,先至完全唔記得自己做過同講過嘅嘢。雖然呢啲事喺我年輕時都有發生,不過真係隨住年紀大,斷片嘅情況多咗,呢個相信都同老咗有關係。

其實我喺兩年前,已經開始食啲補腦嘅維他命,不過我有啲致命習慣,令我老咗真係好易會有老人癡呆--就係唔鍾意用腦,尤其最憎計數,兼瞓覺瞓得過多。

全球失智人口增加,根據國際失智症協會(ADI)2019年全球失智症報告,估計全球有超過5,000萬名失智者,到2050年預計將成長至1.52億人,每3秒就有一人罹患失智症。

目前仲未有任何藥物可以完全治癒失智症,最多只可以延緩退化狀況。面對失智症,同好多疾病一樣,要「及早發現,及早治療」,對病情掌控效果會愈好。失智症研究已實證,日常生活控制三高、戒煙、避免心血管疾病,可降低失智症風險;如果太擔心,亦可以去做下腦部影像檢查。

「記憶減退」係好多人面臨嘅問題,部分生理原因在於人類形成短暫記憶嘅主要大腦區域海馬體(Hippocampus),會隨着年紀增長而逐漸萎縮;有研究顯示,年過50歲之後,海馬體以每年1%至2%體積的速度逐漸萎縮。

所以我依家學人買股票,就係希望賺錢能推動我去用腦計下數。之後亦會逼自己去做少少運動、飲少啲酒。最緊要係keep住每日開心,咁至少個腦可以記得多啲開心事!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭