7-Eleven聯乘Sanrio 萌爆角色化身開運小瓷罌

Sanrio角色向來受歡迎，黛安收到風，7-Eleven同Sanrio合作推出一套10款嘅「開運小瓷罌」，下星期三（20日）起開始換購，希望新一年將幸運同快樂送畀大家！

今次合作以「大滿載」做主題，大家熟悉嘅角色Hello Kitty、布甸狗、AP鴨、大口仔等等，都會化身做小瓷罌，分別穿上5個唔同色系，仲各有寓意嘅日式服裝同大家賀年！呢批小瓷罌以高溫瓷燒製，再由手工技藝師傅以人手上色，每個都好精緻。

想換購就要留意喇，今個月20日至3月2日期間，只要去7-Eleven分店購物滿$20就可以獲得1張印花，之後每滿$10可獲多1張印花，喺3月5日前儲夠10張印花加$68，就可隨機換到2個；或者儲齊6張印花加$38換1個。如果係yuu獎賞計劃會員，亦可以用7,000 yuu積分加$1隨機換1個呀！