中電夥李寶椿書院太陽能項目 獲亞太區創新大獎

環保又可以做善事，黛安講緊嘅係中電同香港李寶椿聯合世界書院（下稱書院）合作嘅太陽能光伏可再生能源項目，獲美國能源工程師協會頒發亞太區年度「區域創新能源項目獎」，表揚佢哋推動可再生能源發展，又幫助基層學生。今次係中電繼2019年獲得該協會頒發「區域能源項目獎」後再次獲獎，厲害！呢個項目係中電喺書院建築物安裝逾千塊太陽能板，估計每年總發電量可達48萬度電，相等於約120個4人家庭嘅1年用電量，每年可減少約250公噸碳排放量。書院又參加中電「可再生能源上網電價」計劃，上網電價收入會用於資助基層學生。

中華電力總裁蔣東強先生同黛安講，今次項目融合創新、環保、幫助基層學童及可持續發展等元素，希望起到示範作用，真係好有意義呀！