黛安
黛安

沙田新城市廣場戶外寵物同樂園 同毛孩打卡放電無難度

發佈時間: 2021/01/28

沙田新城市廣場戶外寵物同樂園 同毛孩打卡放電無難度

疫情下毛孩長期留喺屋企,隨時屈到病。黛安收到風,沙田新城市廣場嘅戶外寵物同樂園已開放,姊妹們可以帶毛孩去玩齊場內平衡木、寵物隧道等玩樂設施,打卡放電無難度!

寵物同樂園以大自然草原為設計概念,以木欄柵為界,劃分成歷奇區同野餐區。木欄柵外嘅野餐區設舒適茶座,最啱主人同寵物一齊野餐互動;欄內嘅歷奇區有4個出入口,全部設雙重閘門,唔使擔心寵物會走失。入面仲設計咗多款寵物遊玩設施㖭,例如「小山丘斜台」係專為體形細小嘅寵物而設,木材可增加上落爬動時嘅摩擦力,可鍛練幼小嘅寵物;「寵物隧道」就最啱毛孩捐窿捐罅;至於「骨頭跨欄架」最好用嚟鍛練愛犬嘅彈跳力。場地仲做足防疫措施,例如規定主人進場時須戴口罩同量體溫,及每兩小時清潔消毒、清理沙池等,每晚亦會進行焗霧消毒同實施人流管制,好細心啊。

撰文: 黛安 消息特靈八卦公關
欄名: 八卦名利場