【聲明】港生活網站並無進行電話推廣活動

陳淑蘭
陳淑蘭

立春啟動吉利喜氣迎福牛

發佈時間: 2021/02/04

立春啟動吉利喜氣迎福牛

好咯,終於立春喇!立春即係正式入咗牛年,可以送走隻衰老鼠,請佢滾蛋!

鼠年滾蛋,踏正牛年就要玩立蛋。你知唔知立蛋係乜?話說喺立春時地球嘅地心吸力最強,因此令雞蛋特別容易企起身。之但係地球引力每一刻都有變化,立春令雞蛋易站立嘅說法雖無科學根據,但真係有好多人成功令雞蛋企立,於是每年立春都有人試玩立蛋㗎。

今年立春比大年初一仲要早到,兼鼠年實在係太差嘅一年,立春算係新一年嘅開始,所以我今年特別重視,要好好做啲吉利嘢,希望自己牛年可以順風順水。

傳統謂立春當日天氣晴朗,則來年豐收;如果當日陰天則來年收成欠豐,諸事不吉。Yeah!琴日二月三日立春,天氣好好,希望經濟可以重返正軌。

習俗話立春嘅時辰最好唔好瞓喺度,因為呢日係陽氣開始起步、升起嘅時刻,應該站立或坐喺度迎接美好嘅時刻,周三晚10點57分就係交節氣嘅時間,進入所謂立春,咁啱我又未瞓,就善用呢個最佳時段,對住唔同方位大聲講多啲吉利說話,祈求牛年順利成功,絕對無錯過新年第一個開運日。

你會話蘭子,你使唔使咁迷信呀?其實我都唔係太迷信,只係跟番啲自己可以輕易做到嘅習俗,做咗又會令自己感覺開心,做做無妨。

我啲朋友話立春一定要食得好,於是我又特別用鮑魚菇嚟炒菜,飲咗杯花旗參茶,加一個喺7-11買嘅碗仔翅做午餐;下午茶就食咗碗牛肚麵。哈哈哈,咁就食勻晒鮑參翅肚喇!你係咪笑緊我儍呢?

其實,唔止係喺立春或特別節日,我時刻都會諗啲唔同嘢令自己感覺良好,幫自己加油打氣㗎,要時時刻刻都有正能量去面對新一天!我做嘅嘢你可能認為儍咗啲,但可以幫自己帶來盼望又何樂而不為呢?(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭