陳淑蘭
陳淑蘭

接財神令人充滿希望

發佈時間: 2021/02/18

接財神令人充滿希望

喺2020年嘅開年飯聚中,席間得到高人梁思浩指點,話要喺初五嘅吉時開大門,將一件唔要嘅嘢丟出門外,開口歡迎財神蒞臨自己屋企,並將自己想要嘅嘢話畀財神爺爺聽。

既然無蝕底,我照做無妨。做完後,自己安慰自己,財神已經關照咗我。而上一年,喺咁困難嘅日子中,我無驚無險地過渡咗,於是喺2021年嘅初五,我繼續接財神駕臨我屋企。

今年,我比上年嘅我更有誠意,至少特登去買一幅會發光嘅財神畫像poster,一路隆重小心地捧住返屋企掛;亦上網去搜尋多啲有關財神嘅淵源。

其實唔止初五有接財神嘅儀式,年初二、初五、初七等,都係祭財神、接財神嘅傳統日子。

我對財神印象最深刻嘅就係細個時,TVB每逢年初一梁醒波扮嘅財神了。佢時時笑呵呵,既和藹又可親,最緊要係非常慷慨,不停派利市。之後對財神有多啲認識,就係許冠傑唱嘅《財神到》,歌詞中所講,「得到佢睇起你,你有前途!」聽完之後,真係好鍾意財神呀!所以財神絕對係人見人愛嘅吉祥神明。

一直都以為財神只得一位,原來財神嘅隊伍十分「龐大」,唔單止有正財神,還有文財神、武財神之分,另外仲有偏財神、準財神同地方特有嘅財神,以及其他「兼職」神仙,數量十分可觀。好多人認為財神即五路神,所謂「五路」,指「東西南北中」,只要一出門,面向五路,路路皆可得財。聽到都令人充滿希望!

當然,好多人會認為拜財神嘅人迷信,但其實呢個行為本質,都係想令人對美好未來有個期盼,滿足下自己嘅一種形式啫;加上2020年,全世界嘅經濟狀況都非常差,令人人都無晒信心。我今年盡量去做足接財神嘅儀式,至少畀個藉口自己,有個大吉大利美好將來嘅願望;喺過程中,我已經好開心,滿足到我自己嘅感覺,我就已經賺咗啦!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭