天際100重開門票買一送二 並推出元宵節二人浪漫晚餐

最近疫情放緩，黛安知道天際100香港觀景台上星期四已經重新開放。聽公關姊妹講，今日起至星期三（22日至24日），天際100會推出「門票買一送二」限時優惠，仲趁住元宵佳節推出二人浪漫晚餐，等大家可以補祝情人節。

公關姊妹話，「門票買一送二」限時優惠，由今日早上10時起至星期三早上10時，喺天際100官方網站以$198購買正價成人門票1張，就可以免費獲贈多2張門票，即係1人價錢就可以3人同遊，勁抵啊！而且門票由購買日起計，有效期30日，大家可以慢慢規劃好時間再去。

另外，今個星期五（26日）就係元宵佳節，公關姊妹話，Café 100 by The Ritz-Carlton, Hong Kong今年特別推出4道菜嘅「元宵佳節二人浪漫晚餐」，另有素食餐單供選擇㖭。晚餐套票即日起至星期三可以喺官網購買，可享優惠價$1,888，已包天際100標準門票2張及兩位用嘅晚餐。大家可以一邊睇住夜景，一邊歎美食，同另一半好好慶祝。