新城市廣場一連兩周 寵物同樂日

疫情放緩，唔少寵物主人都想帶毛孩外出走走。黛安收到風，沙田新城市廣場一連兩個周末，將聯同基督教香港信義會社會服務部嘅「毛孩大笪地」合辦「寵物同樂日」，到時仲有寵物訓練同美容嘅星級達人即場過招畀寵物主人㖭！

公關姊妹話，到時市集會匯集27個參展單位，為毛孩們帶嚟衣食住行各方面嘅最佳選擇，場內仲提供狗狗領養，寵物醫生檢查諮詢、一對一寵物速畫等服務，仲有寵物零食福袋換領。其中下月6至7日嘅活動，兩位本地專業寵物美容師Nyle同Yoyo更會到場表演，仲會即場教授如何護理毛孩皮膚同毛髮，黛安都會帶埋狗狗去取經呀！