【聲明】港生活網站並無進行電話推廣活動

沈桃
沈桃

晚市回來了!

發佈時間: 2021/03/08

晚市回來了!

最近令人開心的消息就是食肆的晚市終於重開!之前禁晚市,食肆老闆和員工固然叫苦連天,其實很多打工仔都受到很大影響。何解?因為並非每個人都可以有住家飯食。

每日放工後,我的晚飯有兩個選擇。如果早放工,可以去超市買些簡單的餸菜回家煮;但如果7點後才放工,為免餓住返屋企,就會在公司附近找東西吃。這樣就可以避開港鐵放工的繁忙時間,醫飽個肚才起程回家!

自從禁晚市堂食,外食就變成外賣,可是選擇就少了很多,畢竟沒有人會在中環買外賣然後搭一小時車回家再食,而屋企附近又只有數間食肆,食來食去都是那幾味,悶了。更有餐廳見晚市外賣銷售情況不佳,下午3點就收工了,連買外賣的機會也沒有!

有一位懶煮飯的同事就用了另一種解決辦法。每逢5點半,她就一支箭衝落樓,去最近的大快活、大家樂或茶餐廳食晚飯,半個鐘之內就要食完。

她說,有次廚房落錯單,出菜慢了,只剩下約10分鐘食飯時間,結果食完個飯已來不及飲杯檸水就要走了。

疫情之下,連食餐晚飯都咁艱難。現在食肆重開晚市,我們終於有啖好食喇!

(本欄逢周一刊登)

撰文: 沈桃 好飲好食好奇之穿花蝴蝶
欄名: 中環蝴蝶