【聲明】港生活網站並無進行電話推廣活動

陳淑蘭
陳淑蘭

女性養顏補品:藕粉

發佈時間: 2021/03/11

女性養顏補品:藕粉

講到食嘅養顏補品,女士們通常都諗到燕窩、花膠呢啲高貴食材,大家都會忽視咗蓮藕,其實佢真係平靚正。連名都非常大吉大利,俗語有云︰「男不離韭,女不離藕。」足見蓮藕對女性真有妙不可言嘅重要性。

現代研究發現,食蓮藕能夠有效地提高睡眠品質,因為蓮藕具安神清心的作用,正如廣告話齋,瞓得好自然靚啦!加上蓮藕具有很好的美容清熱作用,例如當我哋熱氣生痘痘時,食啲蓮藕就起到祛痘作用,令皮膚變得更加潤滑、有光澤。

現代醫學研究仲發現,經常食蓮藕能夠有效促進大腦發育,有效紓緩大腦出現衰老以及退化的情況,仲可以有效預防及延緩更年期。你梗係認為食蓮藕好易肚脹,就覺得食蓮藕會肥,事實證明,經常食蓮藕可以起到好好嘅減肥作用。

係真唔係呀?呢個主要係因為蓮藕含大量粗纖維,所以食蓮藕嘅時候,可以有效咁促進腸胃蠕動,同時排出身體多餘嘅毒素同廢物,從而達到減肥效果。

講到食蓮藕咁正,但又無可能日日煮蓮藕嚟食咁麻煩,唔想咁樣,可以點樣?

你可以每日都食藕粉。藕粉嘅藕係選用肥厚根莖嘅藕加工製成,食嘅時候先用少量溫水將藕粉化開,再攪勻加入滾水,然後一邊加一邊攪拌,之後就會變成透明嘅膠狀。你可以加少少蜜糖或者你喜歡伴食嘅味道混和一齊食,適合做早餐、餐後甜品又或者當代餐食都得。

藕粉含有澱粉、葡萄糖、蛋白質外,仲有鈣、鐵、磷及多種維生素。中醫認為藕能補五臟、和脾胃、益血補氣。生藕性味甘涼,有生津清熱、養胃滋陰、健脾益氣、養血止血嘅功效,我一輪嘴數出佢有咁多好處,咁你唔好發吽豆,一於去發藕粉啦!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭