【聲明】港生活網站並無進行電話推廣活動

陳淑蘭
陳淑蘭

打疫苗前先搞清身體狀況

發佈時間: 2021/03/18

打疫苗前先搞清身體狀況

近排大家見面時嘅話題多數係問:「你打咗疫苗未?」之後便滔滔不絕咁分析每個唔同品種疫苗嘅安全性問題。

我好少咁文靜,答唔上嘴,因為仲未搞清楚啲疫苗。最緊要係,我要搞清楚自己有無啲連自己都唔知嘅暗病,萬一打完出事咁就弊。因為踏入5字頭開始,我好似無驗過身,兼且有時覺得呢度痛嗰度唔暢順,所以打疫苗前我唔係太放心。

朋友聽到我未安排打疫苗嘅理由,就話︰「吓?有無搞錯?車都要每年驗一次啦,點解你無驗身㗎?」

我答︰「因為車廠會提你之餘,如果你過期唔check,整車費就會好勁;至於驗身,我未有特別嘅推動力同急切性,所以遲遲無去check囉。」朋友聽完我咁講,即時反白眼。

老實講,疫苗始終都要打,好似戴口罩咁。你無戴口罩,除咗會被罰錢外,仲會因為無公德心而受到藐視,我已feel到當我話未有接種疫苗嘅計劃時,大家已經用鄙視嘅眼神望我。

放心放心,為己為人,我一定會打,但喺打之前大家真係要先確保自己身體健康,而我的確唔係好清楚自己是否老如松柏,所以有禁忌。

加上有數據顯示疫苗同玻尿酸等有排斥,有可能容易引致面部有炎症,喺打過美容針嘅人身上,更容易產生副作用。英國《衞報》報道,意大利研究發現,BMI(身體質量指數)超過30嘅肥胖人士,接種兩劑新冠(COVID-19)疫苗後,產生之抗體數只有一般人嘅一半。反之,愈苗條、愈年輕,疫苗作用就愈顯著。

因此專家擔心肥胖人士抗體數不夠,會令疫苗效果大打折扣,所以佢哋認為「應該特別替肥胖族群制定有效的接種計劃」,比如體重過重者可能要多打一劑,或打更高劑量的疫苗,以確保達到足夠的抵抗力。

好多專家嘅報告,我仲未可以掌握得晒,所以至少要先check清楚我有無隱疾,才好去打疫苗!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭