【聲明】港生活網站並無進行電話推廣活動

陳淑蘭
陳淑蘭

趁春分祛濕排毒

發佈時間: 2021/03/25

趁春分祛濕排毒

上星期六已經係春分了。24節氣之一的春分,係春季90天嘅中分點,當日南北半球晝夜平分,而喺古時亦稱為「日中」、「日夜分」、「仲春之月」。《明史‧歷一》敘述︰「分者,黃赤相交之點,太陽行至此,乃晝夜平分。」所以,春分嘅意義,指一日時間白天黑夜平分,各為12小時;而立春至立夏為春季,春分正當春季3個月之中,平分了春季。

往時我對24節氣真係唔多為意,但今年嘅春分特別有感受。正所謂「春分麥起身,一刻值千金」,而我,卻感到春分時段起身,成身帶住千斤。周身骨痛咁爬起身,仲要見到鏡中嘅自己,眼皮腫脹,肥腫難分,真係抑鬱……

屋企菲傭姐姐,見到我話佢起身後依然好攰,成身痛之餘眼皮仲好重。Oh!太好了!原來唔係得我一個係咁,因為春分,令我哋一齊春昏。

唔好講笑,即刻摷啲生熟薏米煲水,飲多啲祛咗濕先。除咗飲薏米水外,大家亦可選擇煲玫瑰茶飲:玫瑰花5朵、山楂5顆、香附12粒;洗淨後加3杯滾水焗10分鐘。每餐飯後飲用,可舒肝解鬱、消脹氣。

當然明知呢段時間身體特別容易水腫,應該盡量食少鹽、少辛辣調味嘅食物。春季氣候多變,天氣乍暖還寒,人就容易感冒。蜂蜜含多種礦物質同維他命,仲清肺解毒,最緊要係可以增強人體免疫能力,係春季最理想而又平嘅滋補品。

食多啲士多啤梨都唔錯,唔單止香味令人心情好,原來仲有去火、解毒、清熱嘅作用;而士多啤梨最好喺飯後吃,因為它含有大量果膠及纖維素,可以促進腸胃蠕動、幫助消化、改善便秘,適用於缺乏食慾、餐後腹脹、便秘等病症。

加埋一得閒就用手掌喺肚皮上按順時針方向旋轉按摩,一來有利於促進消化,排除脾胃濕毒;二來有助於腹部嘅保暖,最緊要係將體內多餘嘅濕同氣盡量排出,咁我呢個春分麥起身,就可以一刻值千金了。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭