投資考眼光

出得嚟賺，預咗要還。去年底股海猶如水上樂園，差唔多每日都令人情緒高漲。我身邊嘅朋友話連我呢個無知婦孺每日都股不離口，得得戚戚，睇怕金融風暴應該不遠矣。

過完農曆新年後，我不知不覺由水上樂園衝咗入去風高浪急嘅大海中，開始感受到驚濤駭浪嘅刺激！正所謂贏粒糖輸間廠，此話必然有好多人言中，好彩，我仲未。因為我係一個超級保守同孤寒嘅投資者。我愛上股票，係因為我鍾意證明自己嘅想法，賭自己嘅眼光。例如之前去超市，見到嗰隻罐頭湯，點解時時都唔減價？佢隻股票應該唔錯，於是當我買咗而賺咗錢，好開心之餘，抵償返我喺超市買佢嘅產品無折扣。

去年底當各科技股大放異采時，臨近農曆新年，家家戶戶都去街市買多啲豬牛羊做節，於是我就去搵乜嘢股票同買餸有關聯，結果搵到「中糧家佳康」（01610），買入價2.82元，年初一前佢升到3.15元，我賺到少少就放咗。過完年後，佢飈升到6蚊。雖然搵少好多錢，但係我無唔開心（就假嘅），不過確認咗我自己嘅眼光，就令自我感覺好返啲啦。

環境、社會、政府管治係買股票其中嘅法則，我覺得我算係有呢啲sense，但技術欠奉，正如股神巴菲特嗰句︰「別人恐懼時，你要貪婪；別人貪婪時，你要恐懼。」咁即係幾時應該貪婪？幾時要恐懼呢？我完全唔識，就算嗰啲乜鬼陰陽燭、20天綫、頭肩頸係乜？我都唔識。

不過唔緊要，最緊要我識投資達人黃德几，佢除咗喺電視台、電台、網上媒體主持財經節目，亦喺報章雜誌撰寫專欄，教授理財心得，我即刻搵佢求教。真係搵啱人，因為佢亦有擔任企業培訓及投資課程，佢喺5月會有一個《Finance事Up投資課程》，我梗係立即報名，為我嘅貪婪做好技術準備，一於做個股海乘風破浪嘅大媽！

蘭子提提大家︰投資涉及風險，切勿沉迷賭博！

（本欄逢周四刊登）