屈臣氏嘉許老臣子 送限定版第一熊

疫情下守業唔容易。好似連續12年蟬聯亞洲第一健與美零售商嘅香港屈臣氏，就無忘記同事喺疫情下仍謹守崗位，竭盡所能為顧客提供專業服務。黛安聽公關姊妹講，屈臣氏最近向近160個同事頒發長期服務獎，佢哋都係服務咗超過10年嘅中流砥柱，當中有10位仲服務咗30年至35年。屈臣氏好有心，特意同傷殘青年協會嘅殘疾人士合作，製作咗屈臣氏限定版嘅「第一熊」送畀呢班同事，令佢哋好感動。

黛安睇番隻熊仔，不單止好得意，仲印咗屈臣氏標誌、得獎同事嘅名同服務年資，保證獨一無二，好有紀念價值，藉此感謝呢班同事喺店舖、貨倉及辦公室多年嘅努力同付出；同時亦希望能鼓勵社會支持香港傷殘青年協會，關注唔同社群嘅需要。