黛安
黛安

中電E-Playground新派許願樹 啟發環保低碳意識

發佈時間: 2021/04/13

中電E-Playground新派許願樹 啟發環保低碳意識

近年大眾環保意識提高咗,就算想許願求神,都唔使掟寶碟喇!黛安收到風,中電近期喺林村附近開咗個新室外遊樂園E-Playground,入面設有一棵新派許願樹,姊妹可預約參觀,順便許願㖭。

中電E-Playground係中電首創以電力工程、能源及環保為主題嘅室外遊樂園,建於大埔林村香港青年獎勵計劃賽馬會愛丁堡公爵訓練營內。遊樂園日前已開幕,仲請咗環境局局長黃錦星聯同中華電力主席毛嘉達及總裁蔣東強主持開幕。

園中央嘅「許願樹」最搶眼,遊客可以將願望寫喺樹葉形嘅環保紙,再掛喺設有太陽能板嘅樹上,祝願低碳生活願望成真。公關姊妹話,一向有行山習慣嘅星星局長、蔣東強仲大顯身手,同中學生一齊接駁「發電大挑戰」嘅磁石管道,模擬抽水蓄能發電嘅原理。

星星局長分享,40幾年前,當時佢大約17歲,曾經喺呢個營地參加活動。佢同各位嘉賓都希望啟發年輕一代對能源、環保節能及電力工程嘅興趣,齊過低碳生活。

撰文: 黛安 消息特靈八卦公關
欄名: 八卦名利場