迪士尼15個夢想 父女做同事感情更深厚

今年係香港迪士尼樂園15周年，黛安聽公關姊妹講，Disney Moments HK Facebook專頁會分享「香港迪士尼的15個夢想」視像故事，其中包括Sammy Sir同女兒Louise喺樂園一齊工作嘅故事。公關姊妹話，Sammy Sir自2005年已加入樂園工作，2017年更獲選為樂園度假區親善大使，成為全球迪士尼首位由保安員晉身而成嘅大使。佢個女Louise喺2016年都加入咗香港迪士尼，依家係市鎮會堂負責賓客服務嘅工作，同爸爸做埋同事㖭。

兩父女成日見面，工作上又有共同話題，感情自然變得更好。Louise話，以前見爸爸收工返屋企都面帶笑容又精力充沛，令佢覺得喺樂園返工一定好開心，依家父女已將樂園當成第二個家。爸爸Sammy仲話，身邊嘅演藝人員知道佢同個女一齊喺樂園打工都好羨慕，「我好開心可以將快樂延續到下一代，承傳奇妙力量，我嘅夢想係我個女能夠開開心心喺呢度追尋夢想！」