卡樂B 薯片新搞作 生炒骨味粟一燒

薯片係辦公室常備嘅零食，黛安收到風，卡樂B最近又有新搞作，推出3款地道口味薯片同粟一燒，包括沙嗲牛肉麵味薯片、瑞士雞翼味薯片同埋生炒排骨味粟一燒，夠晒別出心裁。

今次新口味製作都係一貫考究，好似沙嗲牛肉麵味薯片，採用「V-Cut」設計，入口香濃惹味，仲有肉嘅鮮香味，包裝用上「網紅屋邨」彩虹邨做背景，充滿香港情懷。瑞士雞翼味薯片就用上灣仔電車路做包裝主圖；生炒排骨味粟一燒仲有港漫襯底，切合晒「Love Hong Kong」主題。

公關姊妹話，呢3款新產品本月下旬就會喺各大超市、便利店同零售店有售，大家記得去掃貨喇。