【聲明】港生活網站並無進行電話推廣活動

沈桃
沈桃

遙距遊日本

發佈時間: 2021/04/26

遙距遊日本

最近翻睇ViuTV的《花姐ERROR遊》,節目在日本東京和大阪拍攝,到訪東京鐵塔、富士急樂園、富士山及奈良公園等著名景點參觀和玩遊戲,睇到我真係好想即刻飛去日本旅行!

無計,疫情下無得去日本,惟有睇住個綜藝節目先。再唔係不如上網睇吓今屆改為在綫上舉行的「日本面白祭——櫻花祭」,觀看一連串以櫻花為主題的活動及工作坊影片,當去咗日本囉!

其中有一條片《虛擬賞櫻花之旅》由Panasonic贊助,介紹香港人熟悉的東京上野公園,當地正值賞櫻季節,櫻花美不勝收。睇完櫻花,可收看《櫻花摺紙教室》及《櫻花繪畫工作坊》學摺紙和畫櫻花。

活動亦設有幾個有獎遊戲,回答問題有機會獲得精美禮品,其中一份禮品更是Nintendo Switch遊戲機,好吸引!

除了有關櫻花的活動及工作坊,還有滋賀縣高島市、德島縣三好市、小田急鐵路綫神奈川、東京市內美術館的遊覽短片,仲有教你烹調和牛和製作花見丸子的cooking class添!

「日本面白祭——櫻花祭」由即日起至5月16日舉行,想去日本又去唔到嘅朋友,不妨上www.japanfestivalworld.com望梅止渴先啦!

(本欄逢周一刊登)

撰文: 沈桃 好飲好食好奇之穿花蝴蝶
欄名: 中環蝴蝶