20年火運高溫是常態？

「未食五月糭，寒衣不入櫳」這句諺語喺就嚟踏入九運，唔知仲用唔用得着呢？

2020年已經同朋友講︰「死火，我咁怕熱，踏入九運後就會行20年火運。即係話呢20年同火有關聯嘅嘢都特別旺，屬火嘅行業，例如科技、繙譯性質、熱度性質、火爆性質、光綫性質、加工修理性質、再自製性質、易燃性質、手工藝性質、一切人身裝飾物性質，均屬之。」

發光、照明、光學、高熱、油類界、酒類界、熱飲食界、食品界、火鍋店、手工藝品、機械加工品、製造廠、衣帽行業、髮型屋、化粧品。仲有歌舞藝術、百貨、印製、雕刻師、評論家、心理學家、演說家、管理顧問，均屬之。

意外方面都特別同火有密切關係，就以今年辛丑年嘅值年卦為賁卦。賁卦係《易經》六十四卦中第二十二卦。此卦係「下離上艮」。下「離」為火、為太陽；上「艮」係山。故卦相為「山下有火」、「上山下火」或「太陽被壓在山下」之意，意味住2021年地震、火山等自然災害會較為頻繁。

你可能話咁多火山，會爆發有幾出奇啫？而家連冰島西南部雷克雅內斯半島，嗰度沉睡咗近9個世紀嘅法格拉達爾火山，3月時至少發生過4萬次小型地震。上個禮拜，長年受瘟疫同戰禍嘅剛果民主共和國，都遭遇「火山突襲」。位於剛果東境、北基伏省的尼拉貢戈火山，上周六突然喺無預警下噴發，赤紅色嘅熔岩，喺火山山腰崩塌裂口傾瀉而下，一路上消滅咗17座村莊，更直衝入有200萬人口嘅戈馬（Goma）都會區。

天氣方面，4月30日巴基斯坦訥瓦布沙阿市，當地氣溫史無前例高達50.2℃，係亞洲乃至全球有紀錄以嚟4月份溫度最高嘅一日；香港5月23日都錄得36.1度，破盡歷年來5月高溫紀錄。

我而家已要開冷氣加風扇，遲多幾個月，甚至遲多十幾年對住咁多火，點算？而家要開始練習心靜，自然就會涼，希望唔好熱得我太淒涼！（本欄逢周四刊登）