政府號召，人民就會多生嗎？

星期一食lunch後，3點半揸車聽到新聞報道話，中國宣布終止兩孩政策，批准生第三胎。我眼睛即時發光，本來揸緊車都即刻搵個位停低，去google搵生仔關啲乜嘢股票事。結果搵到隻生殖醫療股，即刻喺離收市半個鐘，食住個勢短炒，因為我估呢個「三孩政策」應該會成為呢幾日嘅熱話，究竟內地民眾會響應呢個政策？定係聽完後就不了了之？

中國政府喺2015年實施「二孩」政策，除咗2016年短暫衝過一陣高峰外，之後出生率連續4年出現衰退；2020年新生兒比上年度下降近15%。

大部分民眾不願生育嘅關鍵原因，係佢哋認為收入少，難以撫養小孩。的確隨住社會繁榮，栽培小朋友嘅花費比上一代不菲外，更需精心部署佢哋嘅成長，各種養育費用要計算得更仔細。以前多一個小朋友，可能只係加多雙筷子，但今時今日嗰對筷子已變成用「黃金」造咁貴，因呢個時代個個都想自己嘅小朋友贏在起跑綫，細細個已開始學呢樣嗰樣。

呢個趨勢唔單止中國內地係咁，香港嘅生育成本比之前嗰代貴兼要求高，如今生育成本嘅考慮除咗經濟因素，仲包括時間成本、社會成本、教育程度同社會地位，樣樣都提高晒。就以我身邊嘅朋友生完仔唔夠一年為例，BB仲未完全識行路，就已經安排興趣班，一歲人仔開始參加音樂會，真係匪夷所思。相比我哋以前，而家嘅父母同小朋友所承受嘅壓力，必定大過以前嗰幾代。

所以生仔真係咁容易？政府噏一句叫你生多個，係咪就真係有人去響應呢？我諗就算加埋補貼，以現代人嘅生仔概念，應該比之前要考慮得更周詳。

仔我就無得生喇，希望上天畀我喺投資生仔股票上能夠生隻金蛋啦！

（本欄逢周四刊登）