【聲明】港生活網站並無進行電話推廣活動

陳淑蘭
陳淑蘭

如何優雅地變老?

發佈時間: 2021/06/10

如何優雅地變老?

政務司司長張建宗之前喺一個活動上致辭,話香港大約20年後將成為銀髮城市,到時每3個人就有1個係65歲或以上,因此政府明年首季將會降低2蚊乘車優惠嘅門檻至60歲。即係話眨下眼,我好快就可以用兩蚊坐車。

好多人怕老,怕還怕,就算怕都會老,咁索性開開心心,幫自己注入正能量,優雅咁邁入老年。

當然,邁向老年之路,身體健康好緊要,時間到咗,各種疾病可能一一出現,除咗唔好排斥就醫、治療,仲要坦然接受生病同年老所帶嚟嘅種種不便。以前懶到飛起嘅我,依家真係的起心肝強迫自己做運動,keep住鬆下啲筋骨,咁先可以支持到自己去做喜愛嘅嗜好,去吃、喝、玩、樂!仲要物色啱傾啱Share嘅老伴或老朋友,不過,都要識得享受一個人嘅獨處時光。一個愛自己嘅人,老都要發放自信、自在嘅光采,自然就會顯得優雅。

老咗,縱使無病痛都會出現老化迹象,最明顯係動作同思緒已經無以前咁敏捷,無辦法同時處理好多事情。以前一日可以呢度接嗰度,再去第三、四度見人或辦事,而家去咗第一度、二度地方,就一定想返屋企瞓下先。真係無作大,體力負荷唔到,呢個就係因為之前嘅我懶惰開,所以而家要挑戰自己!

我亦不停挑戰自己嘅記憶力。之前除咗身體懶惰外,連個腦都好懶去用,盡量逃避學新事物,每天做習慣嘅事,於是發覺記性差咗好多,一有少少突發事件就好驚。於是鼓起勇氣跳出舒適圈,等個腦可以用多啲。

呢樣嘢有科學根據㗎,個腦會愈用愈聰明,所以好多退休後腦力勞動愈少嘅人,癡呆發生率就愈高。所以我更要諗多啲投資,為我下半生鋪設更燦爛嘅老年路!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭