海味街保育活動 創意作品冀吸引消費

中西區「海味街」憑經營海味、藥材、南北貨而馳名，黛安聽聞最近有民間團體同學生設計師合作，即日起至今個月底會舉行保育活動，喺附近一帶展出近200件創意作品，最啱文青姊妹去打卡影靚相。

黛安知道，今次活動由民間團體同心網絡發起，獲得海味街過百家商戶支持，仲有30多位香港知專設計學院青年學生參與。活動主題為「珍藏的味道」，旨在重現昔日海味街創業歷程，及介紹宣傳海產、中藥材文化。咁多件創意作品中，黛安最鍾意係高陞街嘅壁畫，高陞街以售賣中藥材聞名，又名藥材街，而壁畫嘅創作靈感都係源自呢度啲百子櫃。

疫情下海味街好多老店都經營困難，部分甚至結業。主辦單位希望今次活動能為海味街帶來新嘅形象與動力，吸引更多市民或遊客來消費，為區內傳統海味及藥材店帶來商機，得以繼續經營。