兒時美味回憶

前幾日喺上環行經一間舊式麵包舖，見到水泡餅、花塔餅同光酥餅，兒時回憶即時湧晒出嚟。一次過買晒佢哋，即刻走去送畀同我咁上下大嘅老鬼自己友，一齊話當年。

細個食呢啲食物時，通常都喺快樂嘅場合享受，所以而家有機會再食呢啲食物，不只是味覺享受，而是開心滋味在心頭。既然開始回憶之旅，咁我就繼續沉醉喺細路仔時代懷念嘅所有食品。

夏天當然唔少得雪糕、雪條、汽水之類。屋企附近有間辦館，最鍾意去拉開佢哋嗰啲用冰水裝住嘅汽水櫃，慢慢扮揀汽水，其實係將大半隻手浸入啲冰水度歎，又爽又過癮，之後就攞我最愛嘅綠寶橙汁汽水。而家偶然都有機會見到盒裝綠寶，但味道同細個飲嘅樽裝完全唔一樣，所以呢隻味只能喺回憶中回味。

另一隻朱古力雪條，美國雪山雪糕Mountain Cream，又係而家搵唔番、食唔到。你哋有無印象呢？佢隻朱古力雪條唔係好濃，咬落去個質感，硬過雪糕但軟過其他雪條，通常我都係一啖一啖咬住食，而家仲記得佢哋個廣告︰「美國雪山雪糕Mountain Cream，食到心都甜！」今時今日，諗到呢隻味真係心都甜。

講到朱古力，小朋友一定鍾意食朱古力啦，記唔記得麥麗素？佢同麥提莎好似，分別就係麥提莎用真正的牛奶朱古力，而麥麗素用代可可脂，所以價錢平啲，細個時就會揀麥麗素，正如佢嘅英文名，「Mylikes」！另外兩款朱古力又係有美好回憶，因為通常食親佢哋，都係人哋過新年送嘅禮盒裝︰金盃朱古力同花街朱古力。兩款朱古力嘅包裝紙，食完用嚟夾喺書本度做書簽，所以上堂時候，本書都充滿住朱古力味，令我上堂時候特別肚餓。

以上嘅食物只係好多分之一，講下都興奮。對於我所講食品，你又有無同我一樣嘅回憶呢？

（本欄逢周四刊登）