【聲明】港生活網站並無進行電話推廣活動

陳淑蘭
陳淑蘭

倒數人生

發佈時間: 2021/07/22

倒數人生

啱啱呢個禮拜,又過了一個生日。

時間係無形嘅,睇唔見亦摸唔到,但佢的確係一分一秒咁流逝,如果無人提醒,大多數人都係不知不覺咁揮霍掉。

生日算係一個鬧鐘,提提你︰過咗1年、2年、5年、10年喇喂!到今日,嘩!咁就過咗50多個寒暑!人生從一開始就喺度倒數緊,進入5字頭嘅人生旅程,不其然喺我腦海入面問自己,究竟我浪費咗幾多時間,同埋仲有幾多時間可以去浪費?我之前無咁多感慨,但今年有呢方面嘅感想,係咪要恭喜我個腦囟終於生埋咗呢?

呢個感受緣自我呢排望住媽咪,發覺佢真係老咗好多。拖住佢嘅時候,覺得佢嘅身軀一年比一年柔弱,心中係難過嘅;為咗唔好畀自己有更多難過,今日有得攬媽咪、拖媽咪、錫媽咪……都要做番多啲,以彌補我呢個衰女包之前生日自己去玩,而忘記呢一日最應該被祝福、被慶祝嘅係我嘅偉大母親大人。

智能手機或iPad有一個app叫Your Last Time,下載咗呢個軟件,佢會喺你手機每日畫面上,以秒速速度顯示畀你知時間一直係咁流逝,亦提示自從你出生後已用咗幾多時間。

當輸入生日程式後,就會自動幫你計算年齡到小數點後8位,唔確定呢8位數係真定假,但就係一個令你可以真實感受到時間流逝,而畫面會每日喺下方角顯示一則有關生命嘅名言,而佢又有「死之時」,會幫你猜測自己可以活到幾多歲,嚟幫你計算壽命嘅剩餘天數。

呢個軟件嘅目的係想叫人實現精采人生,要周詳而富有創意地用好每星期7日,每日24小時。浪費金錢,你失去嘅只係金錢;浪費時間,你失去嘅就係你生命中嘅一部分。

再深入我介紹唔到,因為我無下載呢個軟件,原因係仲未敢面對倒數我嘅人生!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭