陳淑蘭
陳淑蘭

假如網絡突然消失

發佈時間: 2021/07/29

假如網絡突然消失

今時今日,網絡已係生活中不可缺少嘅嘢,無處不在。有人話,人類而家不可缺少嘅物品除咗水同糧食,仲有網絡。但你夠唔夠膽諗,萬一有日網絡突然消失,我哋用唔到電腦、手機,出街無互聯網,㩒唔到錢,碌唔到卡,嗰日會點呢?

記得初入行,拍電影等打燈時,同前輩閒談。佢問我有無買某隻牌子嘅金錶。我話無,我情願買靚衫。佢就同我講:儍女,金錶好有用,萬一打仗或喺危難中,至少可以換個麵包充飢。我聽完之後大笑,咁貴嘅錶淨係等有日用嚟換麵包?我更加唔會去買啦!但呢句話卻深深印咗喺我腦海裏,今日先感受到呢句話嘅玄機。

我一向無乜放現金喺屋企,因為有好多銀行喺附近,兼且有信用卡,使乜驚?但我第一次感受到驚,就係社會運動期間,有個禮拜五,我要畀現金工人姐姐去買定幾日餸。有銀行無開兼櫃員機都無開,我一路搵,搵咗一段時間先㩒到錢,真係無諗過㩒到錢會咁激動!從此我屋企開始放番啲現金。

2020年疫症蔓延,令家家戶戶都要留喺屋企,嗰段時間我同自己講,好彩有互聯網,人喺家企都仲可以同親人朋友藉住遙距溝通,那麼遠卻這麼近,你話無咗互聯網點算?

近期睇到鄭州可怕嘅水災畫面,除咗奪走好多人嘅生命令我心痛之外,呢場可怕嘅天災仲令鄭州市大片區域停電,令所有互聯網絡癱瘓,因為現金從生活中消失太耐,銀行仍因停電關門,好多人甚至「以物易物」,先可以換來所需物資。呢一刻,令我諗番起前輩喺片場嘅說話,原來真係有佢嘅玄機!

凡事都不可以過分依賴,要為自己喺唔同範疇都諗定安全網。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭