【聲明】港生活網站並無進行電話推廣活動

陳淑蘭
陳淑蘭

蘭子的新名字

發佈時間: 2021/08/05

蘭子的新名字

擁有嘅錢我唔多,但擁有過嘅名字都算多。

陳淑蘭,蘭子,Shirley Chin,Sheila Chin,陳道然,最新鮮出籠嘅係陳麗珽,Lighting。呢個新名唔係一早計劃要搵人改,而係機緣下有朋友講開幫佢改名嘅台灣高人好厲害,我好奇佢有幾厲害,咦?發覺都真係講到好多令我驚訝嘅事喎,最緊要係身體同性格,陳淑蘭嘅名字筆劃數,有機會影響晚年。

聽完佢講,我都未係大推動力去改名,直至佢畀咗合適嘅名畀我揀,一睇到呢兩個字即刻兩眼發光︰麗珽!呢兩個音好響,個珽字係第一次接觸,解釋唔到點解我咁鍾意呢個字。再查埋個字嘅意思,珽係古代天子所持的玉笏,《禮記‧玉藻》︰「天子搢珽,方正於天下。」(註:珽之言挺然無所屈也)

型呀!當我話畀好友聽我呢個名,佢哋話︰「吓?叫咗蘭子咁耐,改囗好似有啲難度喎。」

其實唔難,見唔見到天花板嗰盞燈?Lighting咪就係麗珽囉。呢個名不但照亮我下半生,我發現叫住呢個名都帶來好運。試過嘅好運例子好多,所以就算我無逼身邊人叫我新名,佢哋都發自內心咁叫我︰「Lighting,麗珽。」

點解呢個名會有運呢?我有fact check㗎。有咗呢個名後,咁啱睇到玄學大師李居明提到,牛年正進入九運,九運行離卦,一切同離有關都當旺,例如姓黎、李、羅,或名中有個麗字、利、理,將喺九運大旺20年。九運大利丁火,與丁火相通嘅字,例如丁、寧、鄧、紫、燈份外當旺!

影響所及,一切與燈有關嘅物品都大旺。屋企有阿拉丁神燈、火炬、燭台、紅燈籠等,都是大富大貴嘅密碼。我盞燈喺個名度仲唔旺?信不信由你,我選擇相信,能無時無刻搵機會幫自己打氣,發放正能量,何樂而不為?至少自我感覺良好,已經賺咗!光加熱就等於火,麗加珽就等於我,我再也沒法擋,Hey!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭