【聲明】港生活網站並無進行電話推廣活動

陳淑蘭
陳淑蘭

有運動細胞奈何無恒心

發佈時間: 2021/08/12

有運動細胞奈何無恒心

上星期同朋友打羽毛球,打唔夠一個鐘手腳不停咁震,差啲要送去醫院「staycation」!一直都話要開始pick up番做運動,但當筋骨愈來愈硬,成身痛,就更難的起心肝做運動。

因為奧運熾熱嘅氣氛,推動到十幾年無打羽毛球嘅我踏出第一步。你唔好以為我耐無做運動會姐手姐腳,我好有運動細胞㗎,但衰在無恒心。之前喺學校時候,老師見我身形高,試過捉我去玩劍擊。嗰陣仲係有青春有活力嘅我,淨係學90度紮馬出劍已覺得好攰,加上枝劍好幼,我時時都驚會插到隻眼。

無錯!你會話戴住頭盔,點插到呀?我就有戴住頭盔都驚插到眼嘅陰影,所以玩唔到。

於是老師就將我放去玩跨欄。腳長長嘅我,以為跨欄無難度,喺輕視嘅情況下,有一次跨欄,凌空靜止,嘭一聲直插落個欄度,唔使我形容,你都可以感受到嗰下有幾痛啊!之後再見到個欄,就退避三尺,再無勇氣跨過去,亦無諗過要逼自己跨過去,何苦呢?

再之後老師都仲未放棄我,因為我嘅高度唔好嘥,於是放我入籃球隊。又喺一次練波嘅時候,一個大波餅飛埋嚟隻眼度,爆晒血管,嚇死我!嗰刻我以為會盲,之後唔使講,又係因為有陰影而唔再打籃球。有活力但無毅力嘅我,雖不殘,但廢。

要做一個成功運動員,都要有超乎常人嘅毅力、勇氣去投入練習,克服所有障礙,更要有決心、自律、堅持、肯做同有耐心,才可以成為比賽中嘅精英。以上我通通都無,真係性格決定命運。台上一分鐘,台下十年功。No pain no gain!所以我真係好佩服每一位運動員,喺度要特別向佢哋致敬!多謝你哋為香港出戰!辛苦晒!

東京殘奧兩周後就揭幕啦。到時我哋要繼續延續對佢哋嘅愛,再為港將吶喊支持呀!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭