熟齡哥哥姐姐綜藝節目

內地綜藝節目真係好有諗頭，不得不從心讚句︰好嘢！

《乘風破浪的姐姐》係一個將30至50歲以上女性，幫佢哋擺脫年齡束縛，打破標籤定義，鼓勵女性就算踏入熟齡之路，都要勇敢追夢嘅綜藝節目。節目中承載探討好多話題，比如年齡焦慮、職業困惑、自我個性、人生選擇等，幾乎每個女藝人都會面臨年齡和職業發展的困惑期，節目藉住幫各位姐姐組成她們從未試過的女團形式，搵番蹦蹦跳跳嘅青春感。但三個女人一個墟，睇到咁多女人嘅爭執、爭風呷醋真係好有娛樂性，因此《乘風破浪的姐姐》系列好受歡迎。

揾啱方向，梗係咪畀佢停。食住條水，睇完「姐姐」即刻炮製「哥哥」，於是《披荊斬棘的哥哥》面世了！

節目召集咗33位出道多年嘅男藝人，包括有資深音樂人、音樂大佬外，仲有獨立樂團、Rap歌手、鋼琴家、藝術家等等。

《披荊斬棘的哥哥》似乎係更專業嘅音樂節目，亦有唔少回顧同懷舊感覺，亦畀到哥哥們喺各自領域中自由發揮。如果《乘風破浪的姐姐》係勉勵姐姐們勇往直前，咁《披荊斬棘的哥哥》就係畀番大家有回首眺望嘅感覺。

當然呢班哥哥中，仲有好多位我哋嘅「香港仔」哥哥，我更加要捧場啦！佢哋將自己嗰隊稱為大灣區，鬧出好多笑話，我一路睇，一路笑，絕對娛樂性豐富。

無論任何年紀，我發現一堆男人混熟咗，又或者男人同自己有成長經歷嘅兄弟一齊，就會不自覺咁流露出小男孩嘅佻皮，好好笑。

記得我爸爸60幾歲時，帶我同媽咪參加佢嘅老同學旅行團。佢啲同學已經係阿爺阿公，但當佢哋聚埋一齊就好似變番小男孩咁鬥下嘴，或者做啲無聊嘢，但又笑得好開心喎。

我好鍾意睇到呢啲咁可愛嘅場景，可能因為咁，所以我鍾意睇呢個節目！

（本欄逢周四刊登）