【聲明】港生活網站並無進行電話推廣活動

陳淑蘭
陳淑蘭

支持浪浪送行者

發佈時間: 2021/09/02

支持浪浪送行者

我好感恩可以做到《開心日報》主持,唔係賣花讚花香,呢個真係一個正能量嘅電台節目。我哋發放嘅信息,唔敢肯定每個人都收到,至少我絕對係一個受益者!

先唔講節目內容,淨係身邊嘅同事都係善良嘅人,真心關愛大家。第二樣令我得着嘅係,節目搵到好多為社會無私貢獻嘅嘉賓,分享佢哋嘅理念,令我呢個井底之蛙至少可以喺朋友圈幫手呼籲下。大志我就無喇,但至少可以叫做咗啲嘢。

最近同事搵到一個叫「浪浪送行者」嘅義工組織發起人上嚟做訪問,佢哋嘅理念係︰「縱使生前無人寵愛,往生後也有人送行。」我聽到呢兩句說話,內心好感動,即時喺我啲愛動物嘅朋友圈發放呢個義工組織信息,大家踴躍支持。

「浪浪送行者」係由一班熱愛毛孩、有同一理念嘅義工組成,以平等對待每個生命嘅初心守護街上、馬路上意外往生嘅浪浪,幫佢哋有尊嚴咁走最後一程。全屬自資運作,由眾義工自願性去幫助往生嘅動物,不接受任何捐款,只接受物資。

熱心但好懶嘅我,都想參與幫助往生嘅浪浪,為佢哋做番少少嘢,捐贈佢哋有需要嘅物資代替捐款!物資包括︰被仔或大毛巾(新舊均可,善終火化時用來覆蓋身體);細包裝貓狗糧、貓罐罐、細包裝貓狗零食(火化時陪葬品);乾花(火化時陪葬品);尿墊(S或L碼);紙碗;竹炭除臭劑;成人口罩;醫學用手套;透明膠袋;消毒用品;入油券;索帶。

捐贈送行物資可Facebook inbox浪浪送行者告之你嘅電話同地點,浪浪送行者會派附近嘅義工嚟接收。

我送咗油券,因佢哋24小時只要收到電話,不論港九新界都會趕到。辛苦晒你哋!功德無量!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭