【聲明】港生活網站並無進行電話推廣活動

黛安
黛安

美心MX「芒果盛會」 多款餐健康惹味

發佈時間: 2021/09/08

美心MX「芒果盛會」 多款餐健康惹味

芒果係黛安最愛嘅水果之一,原來美心MX以當造芒果為主角,推出咗幾款「芒果盛會」系列食品,公關姊妹首先推介「香芒焗豬扒飯」,芒果嘅果香除咗令豬扒更惹味,芒果醬嘅果香亦同芝士完美結合,令人一試愛上。

專為下午茶推出嘅「香芒沙律配香茅雞髀茶餐」,就將芒果同秘製芒果醬加入沙律當中,配合蘋果同薯仔,一次過享受多款唔同嘅爽甜口感,連同肉質嫩滑同散發檸檬芳香嘅香茅雞髀,自成一格特色風味。晚市亦有兩款「香芒巧手菜」供應,其中「小胡瓜香芒豚肉脆脆」,以粒粒芒果同特製芒果醬,配合炸到金黃酥脆嘅中肥瘦腩肉,夠晒開胃惹味;而「香芒西芹雞柳」則加入時蔬、芒果粒同鮮雞肉,絕對係健康美食嘅首選。

咁多款新餐都令人食指大動,黛安都要去試下。

撰文: 黛安 消息特靈八卦公關
欄名: 八卦名利場