【聲明】港生活網站並無進行電話推廣活動

陳淑蘭
陳淑蘭

遺失電話驚魂記

發佈時間: 2021/09/09

遺失電話驚魂記

從未試過唔見電話嘅我,前幾日終於發生了。

因為我貪方便,將電話放喺背囊側邊個袋度,結果跣咗出嚟自己都唔知。返到屋企,發覺點解唔見咗另一部電話,嚇到呆咗!第一時間走去車度搵,睇下係咪跌咗喺座位或者地下。結果係無!跟住九秒九走去之前去過嘅銀行同商店問,都係唔見!救命!恐慌已經上到腦。因為通常大家都會有好多私密嘅個人資料喺入面,真係晴天霹靂!

我即刻問電台同事有無見到我電話,大家好熱心幫我搵,都係無!鼻哥窿開始嚇到無肉了……人海茫茫,究竟有無人執到我部電話?萬一遇到壞人,睇晒我裏面啲資料點算?

唔見身份證最多走去補領,但係唔見電話,自己嘅個人資料分分鐘要全部改晒,幾麻煩㗎!一諗到呢度已經想暈,好彩突然收到黃桂林電話,我同佢有個群組,有人話執到我電話,入咗去我哋群組留言通知,亦有留低聯絡方法,最終我成功攞番部電話。

原來呢位尼泊爾好心人喺窩打老道執到。佢太好人了,完全唔肯收酬勞,仲咁有心搵番跌咗電話嘅我,真係不幸中嘅大幸!

雖然我已經攞番個電話,仍猶有餘悸。因為電話內實在有太多個人信息,而家好多人將電子銀行嘅資料都放喺手機內,雖然我無艷照喺相冊中,但已經有赤裸裸被窺探嘅感覺,呢個咁驚嘅感覺真係非筆墨所能形容!

當收到呢位好心人嘅信息,大家都好奇怪佢點解可以進入我哋群組留言?其實當時同學們都好擔心我手機內嘅資料有可能被竊,即刻叫我去手機中心遙距刪信息,但電腦白癡嘅我完全唔知佢哋講乜,點上網㩒乜掣,去手機中心點講遙距刪除所有信息!完全接收唔到佢哋講緊乜!

不過識科技不如識到好人,好彩我遇到嘅全部都係好人,壞事都能變成好事!(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭