陳淑蘭
陳淑蘭

堅持追夢的欣宜

發佈時間: 2021/09/16

堅持追夢的欣宜

好耐無睇香港小姐競選了。今年《香港小姐競選》決賽,有李幸倪、鄭欣宜、炎明熹、姚焯菲等擔任表演嘉賓,歌神張學友壓軸演出,令好多觀眾喜出望外。歌神即係歌神,一開口就技壓群芳,魅力唔使講!但我最開心見到欣宜嘅表現,魅力一樣係沒法擋!一身黑皮褸皮褲打扮獻唱《@princejoyce》嘅欣宜,自信同型格十足,果然有肥姐同秋官優良嘅壓台基因。我一路睇,一路從心中為肥姐感到欣慰。

眾所周知,欣宜係肥姐嘅心肝椗。記得之前肥姐生咗小欣宜,帶住佢嚟開工,如果我無記錯,係拍攝《偷情先生》。小欣宜當時應該有2、3歲,細細個已經好機靈。當時我有零食,佢有糖果,佢想要我啲零食,我話不如交換啦,結果佢成功食咗我嘅零食,但我就食唔到佢嘅糖果。當時我笑到不得了,因為佢真係好鬼靈精,好聰明,亦好有表演慾,三歲定八十,加上有父母優良遺傳,真係注定離唔開娛樂圈。欣宜而家嘅成就,大家都睇到係佢好努力闖出嚟嘅,無肥姐喺身邊支持,亦無刻意靠父親幫助,有今日呢個成績真係好值得驕傲。

之前喺沈殿霞(肥姐)逝世13周年時,欣宜喺IG發千字文紀念亡母,寫下︰「我會努力做一個有用嘅人。」字裏行間滿帶着愛而感動不少網民。雖然係星二代,但曾因外形同吳卓羲嘅世紀之吻而備受haters批評,結果患上驚恐症,Joyce說︰「我最困難係入行初初嗰幾年,好多負面聲音,話我揀錯路。甚至初入行時有一位我好尊敬嘅前輩,叫我唔好唱歌!但我堅持,慶幸我有能力追夢,堅持夢想。」

現時嘅欣宜已不再糾結於身材被批評,活得自在,喺舞台上散發光與亮,加油呀欣宜,你仲為我哋發放咗好多正能量呀!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭