【聲明】港生活網站並無進行電話推廣活動

陳淑蘭
陳淑蘭

拖着媽媽的手是福氣

發佈時間: 2021/09/23

拖着媽媽的手是福氣

上星期媽咪95歲生日,我好幸福,佢仲健健康康,當然有啲老人病,但已經好叻叻!有時啲反應仲快過我,有時就有腦退化嘅表現,好難捉摸,點都好啦,有媽嘅孩子像個寶,無論係小孩子定老孩子,仲能夠拖着媽媽的手,是福氣。

朋友見到我同媽咪一齊影相,都讚我係孝順女。真係失禮兼當之有愧。我性格好急,大家有目共睹,超級無耐性,當媽咪講完嘅嘢重複、重複、再重複,我就會忍唔到脾氣,我當然知道佢年紀大,必定無記性,但知又點?一樣會火爆𤷪𤺧發脾氣,發完脾氣就內疚,真係無用!

我一生人後悔嘅事唔多過三件,其中一件就係爸爸生前想我同佢一齊返鄉下祭祖,始終個女叫做係港姐,都算衣錦還鄉。但我就覺得好「娘」,時時扮忙唔去,結果當爸爸離世,我好後悔亦好責怪自己。我爸爸從來無開口要我做任何嘢,呢個係佢唯一渴望我做,而且係非常簡單嘅事,但我都做唔到,真係好痛心,非常非常後悔。

但後悔都無用,正所謂︰「樹欲靜而風不止,子欲養而親不待。」對於普通物件,我們擁有時不懂珍惜,失去了卻念茲在茲;物尚且如此,我們擁有父母的愛,彷彿是與生俱來,如空氣之易得,自然不懂珍惜和感激,所以你如果能夠深切體會和感受到呢兩句說話嘅意思,我肯定你係帶住痛去領會嘅。「樹欲靜而風不止」,是樹的無奈;「子欲養而親不待」,則是人子的無奈。這句話誰不懂?但能夠做到的又有幾人?

所以我唔想再有呢種心痛後悔,我要搶番我任性狂妄嘅日子,要好好珍惜媽咪,亦希望所有雙親健在嘅朋友,好好的珍惜這份幸福。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭