「秋月盛宴」價廉物美

如果你係火鍋愛好者，應該會喺2013年試過位於謝斐道303號王子酒店內嘅東來居。當時好似話佢係米芝蓮推介嘅火鍋店，自家製好多特色餃類而聞名，比起一般火鍋店提供嘅機器製餃類好食，印象中「黑松露鮮蝦雲吞」同「九層塔蚵仔餃」，當時算係好有gimmick。仲有一個招牌菜之一「3秒腐皮」，浸3秒即刻夾起嚟食，腐皮稍微沾上湯汁又帶點脆，真係好過癮。之後酒店轉咗手，應該連帶火鍋店都結業了。（應該係，除非唔係！）

今年朋友再約我去謝斐道303號王子酒店個地址，搵到我儍都搵唔到，因為人哋而家唔係王子酒店而係叫Konnect，一幢集合餐飲、服務式辦公室等多元化服務於一身嘅新概念商廈。旗下分別有位於2樓食川菜嘅紅花會，6、7樓為粵菜，9樓食潮州菜，其中7樓同9樓有私人廂房，可供會客或朋友聚會。

朋友請我去食佢哋嘅中秋節套餐，每位$350，價廉物美，之前我完全估唔到係呢個價，因為食物味道加賣相非常高水準，仲要飽到我要打包返屋企，第二日再食。

呢個「秋月盛宴」套餐包括有︰前菜：醋味雲耳、香油蒿筍絲及三香三椒蹄花肉。開胃誘人嘅前菜，含大量膠原蛋白嘅前豬腳，配秘製麻辣醬汁，有麻香又辣得清爽，喚醒味蕾，再加個老火湯。

主菜有︰藤椒醬烤匈牙利黑豚肉腩、口水雞、花膠絲濃湯浸菜苗加埋紅花水煮或酸菜煮海中寶。通常外面係只用魚嚟煮，換上海中寶，內有桂花魚、蝦、帶子、鮮魷，我覺得更精采，啱我口味。

仲有四川擔擔麵，救命！我已經飽到翻艇，惟有打包，最後仲有甜品。所以呢個價的確抵到喊。不過唔好意思，過咗中秋已無咗呢款盛宴，不過唔驚，嚟緊有9道菜嘅$880蟹宴。好！一於做一個禮拜運動，再去擦餐勁！（本欄逢周四刊登）