日本人氣插畫家粉飾崇光百貨 推廣可持續發展

秋天最適合去郊遊，黛安收到風，最近崇光百貨同日本人氣插畫家Masami Yanagida合作，即日起至本月26日，展開「Choice for the Future」推廣活動，除咗透過佢嘅創意畫風，將崇光銅鑼灣店粉飾成秋日樂園，仲首度同日本崇光及西武百貨合作，與Masami Yanagida聯乘推出兩款限量精品，包括野餐墊及野餐椅，現凡換購／售出1件聯乘精品，崇光都會捐出$20畀「香港地球之友」作為支持及推廣可持續發展。

Masami Yanagida同崇光聯乘嘅兩款精品，以簡潔鮮明色彩配合大自然元素，透過9個與可持續發展有關嘅造型創作，希望喚醒大眾對可持續發展嘅關注。顧客累積購物滿$1,000（最多2張發票），即可以優惠價換購聯乘精品1件。