樂施米綫上義賣大行動 籌款助基層

相信大家對「樂施米」一定唔陌生，公關姊妹同黛安講，今年樂施米義賣大行動以綫上形式同全新形象推出，除咗「變身」為本港基層婦女加工製作嘅炒米茶「樂施‧米茶」，仲配搭咗公平貿易嘅健康有機糙米餅，用埋獨家設計嘅帆布袋包裝。「樂施‧米茶」由樂施會聯同社企「共廚家作」同「杏林藥行」資深註冊中醫師鍾蔭華設計，除咗原味炒米茶，亦配以桂花同玫瑰花，有不同功效同口味，有機糙米餅仲可配搭鮮果等不同材料做美味早餐㖭！

限量版「樂施‧米袋」每袋售$198，籌得款項將支持樂施會嘅香港及國際扶貧項目，幫助受疫情影響農民、基層同弱勢群體脫貧自立。趁住嚟緊星期日（17日）係國際滅貧日，樂施會仲會聯同義工向清潔工友、基層劏房家庭派發米包，為基層同弱勢社群打氣。想了解詳情可【按此】登入。