麥當勞推16款「鏡仔卡」 賀MIRROR出道3周年

黛安係MIRROR嘅粉絲，睇住佢哋成軍3年仲咁成功真係好開心。麥當勞早前同MIRROR幾位成員聯乘推出新產品，每一次都掀起熱潮，最近更一次過同12位成員合作，順便慶祝佢哋出道3周年，除咗會推出新嘅宣傳片同相，下周一（25日）起購買期間限定嘅全新口味麥炸雞，更有機會換到唔同成員嘅「鏡仔卡」，仲有專屬顏色包裝盒㖭！

姊妹話，全套16款「鏡仔卡」各有專屬顏色嘅個人卡，亦有4款團體卡，未來一個月每周推出4張，數量有限，送完即止。下周一起麥當勞App用戶憑唔同嘅電子優惠券，以優惠價買新款麥炸雞，即可隨機獲得姜濤、Stanley或Tiger嘅「鏡仔卡」或團體卡，只要集齊16張個人及團體卡，最後一周更可獲神秘驚喜彩蛋。

今次麥炸雞包裝盒仲加入擴增實境（AR）技術設計，大家只要scan包裝盒上嘅QR code，就可以睇到相應嘅MIRROR成員，等大家可以同偶像近距離一齊「食雞」，共12款包裝盒會分4個星期推出，鏡粉又點可以錯過呀！