「譚仔姐姐」 2046未來制服 知專創意設計

譚仔雲南米綫（譚仔）除咗出品有水準，「譚仔姐姐」亦係佢哋一大特色。黛安聽聞譚仔為咗慶祝25周年，邀請咗超過30位香港知專設計學院時裝及形象設計及傳意設計學系嘅學生，參加「譚仔姐姐2046未來制服設計比賽」，為「譚仔姐姐」設計25年後嘅制服喎。

佢哋噚日舉行虛擬時裝騷，人氣十足嘅媚姨、譚仔姐姐首席KOL紅梅姐、葵芳店店長菊姐等，同多位名模一齊着住學生設計嘅作品行catwalk。當中唔少設計都好有創意呀，例如有學生將生菜、芽菜同港式霓虹燈融入設計之中，充滿驚喜。

譚仔國際集團主席兼行政總裁劉達民更親身壓軸出場，同大家一齊謝幕，佢話今次比賽除咗畀學生發揮創意，亦希望譚仔可以繼續發揮創意、努力發展。黛安收到風，贏到今次比賽嘅學生，將會為譚仔設計新制服，亦會獲得獎學金繼續修讀同藝術創作有關嘅課程，其他表現優異嘅學生都有機會去唔同廣告公司實習㗎。