K11 MUSEA懷舊維港雪糕亭 靈感源於遊樂場

近日黛安去過尖沙咀K11 MUSEA，見到星光大道附近多咗個八角亭，原來呢個懷舊嘅藝術裝置係著名室內設計師Joyce Wang嘅新作，名為《維港雪糕亭》，亦係K11 MUSEA策劃首個藝術與設計之旅嘅重頭戲之一。公關姊妹話，Joyce嘅設計靈感係來自歷史悠久嘅遊樂場，雪糕亭呈八角形，正面同側面都見到流暢綫條，佢特意選用綠色、珊瑚色和黃色做主要色調，而選用水磨石更可喚起傳統情懷，令唔同年齡層觀眾更易有共鳴。

姊妹話，即日起喺呢度仲可品嘗到人氣曲奇店Cookie DPT炮製嘅6款雪糕曲奇三文治，食住雪糕欣賞維港景色，真係正呀。