陳淑蘭
陳淑蘭

調整心態迎老年

發佈時間: 2021/11/04

調整心態迎老年

每個人嘅老化過程不盡相同,有啲女仔去到20幾30歲,已覺得自己老,開始好緊張變老。

好彩我儍儍地,30、40歲時仍未察覺到變老嗰份恐懼,但一踏入50,老年感就日日籠罩住我!唔知係咪隨住「入五」身體狀況嘅改變終於殺埋身,例如老花,當睇唔到餐牌同埋單時睇唔到銀碼,又無帶老花眼鏡喺身,都幾無助。其次今日個膝頭哥痛完,第日又輪到頸椎痛,過多幾日再嚟個大合奏交響樂,腰背加五十肩再加埋未痛完嘅膝頭。唉,就連記性好似都衰退咗好多。去到呢個地步,自己想唔認老都唔得,而呢個仲係進入老年嘅起步。

每個人嘅老化都存在差異,提早了解身體將如何變化,不僅可以提醒我哋要從而家就好好照顧自己嘅身體同心理,好等我哋喺前面嘅路更容易接受自己嘅變化。

心理學家認為,中年人要開始接受自己邁向老化嘅生理改變,而唔係去逃避呢啲過程。只有接受老化,並作出適當嘅生活習慣、觀念同心理調整,先可以活得健康,過得快樂,最緊要係令自己繼續充滿自信!所以我同自己講,為咗我嘅「老運」依然豐盛,真係要安排了。如果之前仲未打點好自己嘅生活,而家真係要逐步安排喇。

我已經開始籌備我嘅身後事,乜嘢人點樣為我打理乜嘢,萬一自己一路好走,都希望我阿媽、阿貓阿狗都能夠一路好過,好好生活。呢個絕對係用正能量心態來處理負能量嘅狀態。

其次就係為咗避免自己變成孤單老人,對老年時要獨自生活嘅我嚟講,朋友係難以取代嘅寶貴資產。透過良好嘅互動,擴大自己嘅朋友圈,不單keep住班老友,仲要識番啲小朋友!所以要提醒自己千祈唔好做一個食古不化嘅蘭子婆婆!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭