【聲明】港生活網站並無進行電話推廣活動

陳淑蘭
陳淑蘭

10月已訂不到聖誕樹

發佈時間: 2021/11/11

10月已訂不到聖誕樹

光陰似箭,又就快到聖誕。疫情令好多每年出埠過節嘅人都飛唔到,於是更多人留喺屋企布置迎聖誕。上年我無諗到呢個原因,無特別提前訂聖誕樹,結果遺憾地過咗個無聖誕樹嘅聖誕節。經一事長一智,今年10月尾即刻走去訂樹,有無搞錯?竟然都無?實在係晴天霹靂!

原因係新冠疫情未止,令全球物流受阻,歐美不少地方因感染率高而封城,甚至令碼頭工人無得返工。其次因海運缺櫃、運費漲價等因素,影響貨物無法運出導致供應鏈斷裂。總之今年好多花店都未必訂到美國聖誕樹,有啲花店為安全起見,推薦客人訂購丹麥Royal Fir品種嘅聖誕樹。我始終比較鍾意Noble Fir,因為佢嘅樹味比較濃烈。

老實講,我都唔應該太奄尖,事關就算係美國家庭,今年聖誕都未必家家有聖誕樹。

原來往年美國嘅聖誕裝飾品同樹,好多都係來自中國批發市場義烏市。嘩!真係長知識,之前真係無為意距離上海250公里嘅中國小鎮義烏市,原來全世界超過60%嘅聖誕用品都係產自呢度,如今已有600多間聖誕工廠。佢哋嘅聖誕樹通常經歷一個多月遠洋航行後,就會喺11月26日之前到達美國洛杉磯、舊金山、休斯敦嘅碼頭,沿一般公路或鐵路網絡,直奔美國本土每個角落。但今年受上述原因影響,美國家庭就未必家家戶戶都買得到聖誕樹。

以前我真係從未諗過聖誕節要撲聖誕樹,只要打個電話落訂,聖誕樹就會送到屋企,今年特登早成兩個月都買唔到,真係唔忿氣,但係我無氣餒,一直搵一直搵,終於感動咗聖誕老人!搵到一棵Noble Fir。

而家已經訂咗,希望唔好有阻滯,順利嚟到我屋企,等我可以聞得嗰陣幸福聖誕味!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭