【聲明】港生活網站並無進行電話推廣活動

陳淑蘭
陳淑蘭

追憶香港女兒梅艷芳

發佈時間: 2021/11/18

追憶香港女兒梅艷芳

好耐無試過,差唔多所有朋友都去睇呢齣電影,兼且全部反應係一致感動!呢部由導演梁樂民擔任執導及編劇,江志強監製嘅香港傳紀式電影《梅艷芳》,拍咗7年,誠意可嘉,台前幕後與觀眾同樣帶住「愛的懷念」,去追憶我哋嘅香港女兒--梅艷芳。

韓國好流行有國民媽媽、國民女婿、國民女兒;內地「國民閨女」係關曉彤,木村拓哉女兒係日本「國民閨女」;而香港女兒,梅艷芳可以話係當之無愧!

Anita嘅影響力唔單只喺演藝界,更代表咗成個香港及華人社會,除咗歌藝事業獲得不同大小獎項,佢有份參與嘅慈善事業亦多不勝數。

梅姐從4歲半開始就跟隨媽媽所創辦嘅歌舞團走遍大街小巷,喺荔園小舞台登台獻唱。長大後,同家姐梅愛芳共組合唱團,喺各大歌廳、舞廳、夜總會遊走,以歌餬口,生活艱苦。可能因為年紀輕輕已有唔少經歷,所以佢嘅歌演繹得好有感情。梅姐草根出身,靠自己努力打拼,絕對可以帶出香港人嗰份獅子山下精神。佢嘅光輝事業,早已寫喺香江歷史。

佢絕對係百變梅艷芳!面面俱圓,令人敬佩。作為藝人,佢專業嘅個人魅力毋庸置疑;作為領導者,佢帶頭成立香港演藝人協會並成為會長,每當藝人遇到有不公平嘅對待或困難,佢總會第一個出嚟發聲,為藝人爭取公平,提供協助。作為前輩,佢非常照顧後輩,經常畀機會新人,今時今日,好多被佢提拔過嘅後輩已獨當一面。就算梅姐已身患絕症,依然喺最後一場演唱會拖着殘軀賣力演出,將生命獻畀舞台,獻畀所有愛佢嘅人。

藉住睇呢齣戲,除咗可以盡情懷念梅艷芳,Anita更帶我哋一齊返去以前嘅美好回憶中。

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭