將軍澳海天晉滙開幕迎聖誕 哥斯拉進駐 5大打卡位

位於將軍澳南岸嘅「Ocean PopWalk海天晉滙」將於聖誕正式開幕，黛安收到風，商場搵咗大名鼎鼎嘅「怪獸之王」哥斯拉嚟做開幕嘉賓，今個星期六（27日）起至明年1月2日，佢會同一班大怪獸進駐商場唔同地方，陪大家過一個藍色嘅「火熱」聖誕。

場內設有5大怪獸打卡位，如海天晉滙外面一段彩虹跑道，就有個7米長嘅噴火哥斯拉，既可愛又有型；地下中庭亦有「怪獸之王夢工場」大型主題裝置；另外，本地玩具達人亦會借出100件極具收藏價值嘅怪獸人偶展出；同時設有6組創意同電影感十足嘅場景擺設，更有由日本東寶電影公司與美國傳奇影業共同借出嘅哥斯拉同金剛人偶㖭。場內仲設有期間限定店，有唔少精選玩具，及設有哥斯拉人偶盲盒販售機，粉絲唔好錯過。

此外，開幕當日商場會大派哥斯拉主題開幕福袋，及舉行「Godzilla@Ocean PopWalk紀念印繪寫」活動，顧客憑指定消費或The Point by SHKP會員積分，更可換領限量主題口罩、野外兩用保溫袋等禮品。