黛安
黛安

利奧坊「傳統×新造」佛系聖誕市集 自由定價隨緣選購

發佈時間: 2021/12/01

利奧坊「傳統×新造」佛系聖誕市集 自由定價隨緣選購

黛安聽公關姊妹講,恒地旗下嘅利奧坊Square Mile「傳統x新造」周末市集,今個月18至19日及25至27日將壓軸舉行「佛系聖誕市集」,除咗有「佛系聖誕鹿飛機」打卡裝置、「佛系發呆區」同「佛系環保擊樂滙演」,仲有「佛系自由定價攤位」,大家可「隨緣」選購心水產品。

今次市集請咗多個打破傳統嘅手作品牌,齊集超過40個特色攤檔,將經典紅白藍設計、香港漁村、霓虹燈招牌、燒味和麻雀等香港傳統元素,創作出各款新潮手作,又搜羅咗一系列由本地設計師操刀設計、復康人士製作嘅升級再造產品,以「佛系」自由定價出售,檔主都會捐出部分商品,畀顧客以「隨緣價」購買,有關產品嘅收入會直接捐畀聖雅各福群會賽馬會升級再造中心,為慈善同環保出一分力。

另外,場內嘅打卡點聖誕鹿飛機都係由環保物料製成,100%可回收和分解,大家掃描二維碼就可以影相打卡,只要將相片上載至社交媒體並標籤「利奧坊」,再向在場職員出示就可以獲得聖誕禮物一份。

撰文: 黛安 消息特靈八卦公關
欄名: 八卦名利場