【聲明】港生活網站並無進行電話推廣活動

陳淑蘭
陳淑蘭

為腦退化照顧者打氣

發佈時間: 2021/12/02

為腦退化照顧者打氣

好多人以為阿茲海默氏症(俗稱老人癡呆),只係患者嘅記憶力出現衰退,無記性啫。如果你有機會接觸或照顧失智者,就會體驗到佢哋嘅持續性神經功能障礙,例如認知功能衰退、情緒不穩、有幻覺、行為改變等。

我媽咪之前只係記性差,不斷重複講同一件事、每兩日就話工人姐姐偷嘢或亂咁畀藥佢食而發脾氣。呢個月情況開始轉差,已經出現幻覺,不停話工人姐姐帶陌生男人返屋企,甚至自己報警兩次。真係辛苦晒聖約翰救傷隊同警察叔叔。我諗佢哋每日都會接好多呢啲「運吉」案件,趕到去現場,可能只係患者嘅幻想而白行一趟。當我同媽咪講,無呢個男人,只係佢幻覺!佢唔會信你,依然好堅持佢嘅說話。無耐性嘅我,真係激氣到爆炸。

上星期晚,終於發生媽咪第一次離家出走!佢趁工人姐姐入咗洗手間,神不知鬼不覺咁走出街。如果唔係遇到一位好好嘅便利店工作人員,半夜打電話畀我,我哋無人知道佢走失咗。當然佢係唔知自己身在何方,我帶住兩個工人姐姐去搵佢,搵到後,我叫姐姐扶佢上車,因為我嘅情緒已經嬲到驚控制唔住!我阿媽見到我嬲,佢竟然仲嬲過我!

其實我好清楚佢係身不由己,損壞同退化嘅腦細胞,根本令佢唔知自己做緊乜,所以作為照顧者其實好吃力。我買咗好多有關呢方面嘅書籍,去學習怎樣照顧媽咪,但始終自己嘅耐性超級低劣,令我非常內疚。

一旦發現有腦退化迹象,睇醫生食藥係非常重要。當我帶媽咪去到醫生嗰度,護士同醫生都對我講︰「辛苦你了」!呢句說話畀我嘅支持好大。

藉住呢個機會,我想同照顧者打氣加油。你哋辛苦了!如果你都認識身邊有照顧者,不妨為佢哋打氣!等佢哋知道佢哋唔係孤獨無援!

(本欄逢周四刊登)

撰文: 陳淑蘭 樂天知命,直言無忌的電視及電台節目主持人。
欄名: 口沒遮蘭